Matthew 9

UJesu Usilisa Umuntu Owome Izitho

1UJesu wangena esikepeni wachaphela ngasedolobheni lakibo.

2Amanye amadoda aletha kuye umuntu owaye ome izitho elele ecansini. UJesu ebona ukukholwa kwabo wathi kowome izitho, “Woba lesibindi, ndodana; izono zakho sezithethelelwe.”

3Bekuzwa lokho abanye abafundisi bomthetho bahleba bodwa bathi, “Umuntu lo uyahlambaza!”

4Esazi imicabango yabo uJesu wathi kubo, “Kungani licabanga izinto ezimbi ezinhliziyweni zenu na? 5Yikuphi okulula, ukuthi, ‘Izono zakho sezithethelelwe’ kumbe ukuthi, ‘Sukuma uhambe’? 6Kodwa ukuze lazi ukuthi iNdodana yoMuntu ilamandla okuthethelela izono emhlabeni … ” Wasesithi kowome izitho, “Sukuma, thatha icansi lakho uhambe uye ekhaya.” 7Indoda yasukuma yaqonda ekhaya.

8Ixuku lathi likubona lokhu abantu besaba kakhulu; basebemdumisa uNkulunkulu owayenike amandla la ebantwini.

Ukubizwa KukaMathewu

9Kwathi uJesu eseqhubeka esuka lapho wabona indoda eyayithiwa nguMathewu ihlezi edladleni lokuthelisa. “Ngilandela,” kwatsho uJesu kuyo, uMathewu wahle wasukuma wamlandela.

10Kwathi uJesu esidla endlini kaMathewu kweza abathelisi abanengi le“zoni” bonke bezokudla laye kanye labafundi bakhe. 11Kuthe abaFarisi bekubona lokho babuza abafundi bakhe bathi, “Kungani umfundisi wenu esidla labathelisi le‘zoni’ na?”

12UJesu wakuzwa lokho wathi, “Abaphilayo kabayidingi inyanga, kodwa idingwa ngabagulayo. 13Kodwa hambani liyofunda ukuthi kutshoni lokhu ukuthi, ‘Ngokuba ngifuna isihawu hatshi umhlatshelo.’ Ngokuba kangilandanga ukubiza abalungileyo, kodwa izoni.”

UJesu Ubuzwa Ngokuzila

14Kwasekufika abafundi bakaJohane bambuza bathi, “Kungani thina njalo labaFarisi sizila, kodwa abafundi bakho kabazili?”

15UJesu waphendula wathi, “Izethekeli zomyeni zingalila kanjani esesekhona phakathi kwazo na? Sizafika isikhathi lapho umyeni ezasuswa kuzo; kulapho-ke bezazila.

16“Kakho umuntu othungela isichibi selembu elitsha elingakafinyeli esigqokweni esidala ngokuba isichibi sizadonsa esigqokweni ukudabuka kuqhele ngamandla. 17Futhi abantu kabatheli iwayini elitsha emigodleni yezikhumba emidala. Bangenzenjalo imigodla izaqhaqheka, lichitheke iwayini lemigodla ihle iguge iphele. Hatshi, bathela iwayini elitsha emigodleni yezikhumba emitsha besekulondolozeka kuhle kokubili.”

Intombazana Efileyo Lomfazi Ogulayo

18Wathi esakhuluma lokhu kwafika umbusi waguqa phambi kwakhe wathi, “Indodakazi yami isanda kufa. Kungenani woza ubeke isandla sakho phezu kwayo, izaphila.” 19UJesu wasuka wahamba laye kanye labafundi bakhe.

20Khonokho owesifazana owayehlutshwa ngumopho okweminyaka elitshumi lambili weza ngemva kwakhe wabamba umphetho wejazi lakhe. 21Wazitshela wathi, “Aluba nje ngingathinta ijazi lakhe kodwa lokhu, ngizasila.”

22UJesu wanyemukula wambona. Wathi kuye, “Mana isibindi, ndodakazi, ukukholwa kwakho sekukusilisile.” Lakanje owesifazana lowo wasila ngalesosikhathi.

23UJesu wathi esengenile endlini yombusi, ebona abahlabeleli bokulila kanye lexuku elalixokozela, 24wathi kubo, “Phumani. Intombazana kayifanga kodwa ilele.” Kodwa bamhleka. 25Ixuku labantu selikhutshelwe phandle, wangena wayibamba ngesandla intombazana yaphakama. 26Isenzakalo lesi samemetheka kuwo wonke ummango.

UJesu Usilisa Isiphofu Lesimungulu

27Kwathi uJesu esuka lapho amadoda ayiziphofu amabili amlandela ememeza esithi, “Sihawukele, Ndodana kaDavida!”

28Esengenile endlini iziphofu lezo zeza kuye wazibuza wathi, “Liyakholwa na ukuthi ngingakwenza lokhu?” “Yebo, Nkosi,” bamphendula.

29Wasezithinta amehlo wathi kuzo, “Kuzakwenziwa kini njengokukholwa kwenu;”

30basiliswa babona. UJesu wabaqonqosela wathi, “Akungabi lomuntu ozakwazi ngalokhu.”

31Kodwa zasuka lapho zafakaza ngaye ummango wonke welizwe lelo.

32Ekuphumeni kwalezoziphofu, kwalethwa kuJesu indoda eyayikhwelwe lidimoni iyisimungulu. 33Kwathi idimoni selikhutshwiwe indoda leyo eyayiyisimungulu yakhuluma. Ixuku labantu lamangala abantu bathi, “Akukaze kubonwe okunje ko-Israyeli.”

34Kodwa abaFarisi bathi, “Amadimoni uwakhupha ngenkosi yamadimoni.”

Izisebenzi Zilutshwana

35UJesu wanquma kuwo wonke amadolobho lemizi efundisa emasinagogeni abo, etshumayela izindaba ezinhle ezombuso njalo eselapha zonke izifo lemikhuhlane.

36Wathi ebona izixuku zabantu wabazwela usizi ngokuba babehlukuluzekile bephelelwe, benjengezimvu ezingelamelusi.

37Wasesithi kubafundi bakhe, “Isivuno sinengi kodwa izisebenzi zilutshwana.

38Ngakho celani iNkosi yokuvuna ukuba ithumele izisebenzi ensimini yokuvuna.”